System Rheoli Asedau Seilwaith Priffyrdd
Mae Strategaeth Ddigidol Ceredigion yn nodi cyfeiriad clir ar gyfer sut y gall technoleg helpu'r Cyngor i weithio'n well i staff, trigolion a chymunedau. Wedi'i hadeiladu o amgylch tair thema - Sefydliad Digidol, Trigolion Digidol a Chymunedau Digidol - mae'n canolbwyntio ar ddefnyddio offer digidol mewn ffyrdd ymarferol i wella gwasanaethau, gwneud gwybodaeth yn haws i'w chyrchu, a chefnogi bywyd bob dydd ledled Ceredigion.
Y cam nesaf yw adeiladu ar y cynnydd sydd eisoes wedi'i wneud a throi'r gwaith hwnnw'n welliannau gweladwy a pharhaol - prosesau mewnol symlach, gwasanaethau mwy hygyrch, a phrofiadau gwell i'r bobl sy'n eu defnyddio.
Un datblygiad pwysig yw cyflwyno'r System Rheoli Asedau Seilwaith Priffyrdd newydd. Mae'r System Rheoli Asedau Seilwaith Priffyrdd yn dwyn ynghyd wybodaeth allweddol am ffyrdd, palmentydd, arwyddion, draeniau ac asedau priffyrdd eraill fel y gall staff weld yr hyn sydd wedi'i adrodd, ble mae wedi'i leoli, beth sydd angen ei wirio a pha gamau sydd wedi'u cymryd.
Ar gyfer timau Priffyrdd, mae hyn yn darparu ffordd fwy cyson a dibynadwy o reoli gwybodaeth, cefnogi'r broses o wneud penderfyniadau a chydlynu gwaith ar draws y gwasanaeth.
Drwy ddod ag archwiliadau, cofnodion asedau, ymholiadau cwsmeriaid a gweithgarwch gweithredol ynghyd mewn un system, bydd y System Rheoli Asedau Seilwaith Priffyrdd yn gwella'r ffordd y caiff materion priffyrdd eu cofnodi, eu hasesu, eu blaenoriaethu a'u datrys. Bydd gan gydweithwyr wybodaeth gliriach o'r adeg y caiff mater ei adrodd hyd at y camau a gymerir, gan helpu timau i ymateb yn fwy effeithiol a darparu gwasanaeth mwy cydgysylltiedig.
Bydd timau gweithredol hefyd yn gallu cofnodi gwybodaeth ar y safle gan ddefnyddio dyfeisiau symudol, gan gynnwys ffotograffau a manylion am leoliad sy’n fanwl gywir. Bydd hyn yn lleihau gwaith papur, yn gwella cywirdeb ac yn sicrhau bod staff yn gallu cyrchu'r wybodaeth sydd ei hangen arnynt yn fwy amserol wrth weithio ar draws y rhwydwaith priffyrdd.
Bydd trigolion hefyd yn gweld manteision drwy ddefnyddio’r swyddogaeth ‘Fy Nghyfrif’, sy’n cynnig ffordd symlach a mwy hygyrch o roi gwybod am faterion priffyrdd, megis tyllau yn y ffordd, arwyddion sydd wedi’u difrodi a phryderon lleol eraill. Gellir marcio adroddiadau ar fap ac ychwanegu ffotograffau atynt, gan roi gwell gwybodaeth i dimau o'r cychwyn cyntaf a'u helpu i sicrhau ymateb priodol yn gynt. Dylai hyn olygu proses adrodd gliriach a mwy tryloyw i drigolion, gan ei gwneud yn haws iddynt godi materion a sicrhau bod gwell gwybodaeth ar gael i gefnogi cynnydd. Os nad ydych wedi cofrestru eto, cliciwch yma i gofrestru ar gyfer Fy Nghyfrif a chael mynediad at ystod o wasanaethau'r Cyngor ar-lein.