Lansio Gwobrau Caru Ceredigion 2026
Mae Cyngor Sir Ceredigion yn gwahodd ceisiadau ar gyfer Gwobrau Caru Ceredigion 2026, wrth baratoi i ddathlu llwyddiannau eithriadol busnesau, cymunedau ac unigolion y sir am y drydedd flwyddyn yn olynol.
Bydd Gwobrau Caru Ceredigion 2026, a gynhelir ar y 10fed o Ragfyr yng Nghwesty'r Plu, Aberaeron, yn cydnabod cyfraniadau a chyflawniadau eithriadol busnesau, prosiectau cymunedol ac unigolion ar draws y sir.
Mae ceisiadau ar gyfer y gwobrau bellach ar agor, gyda 12 categori yn cydnabod llwyddiannau ar draws ystod eang o feysydd. Mae'r categorïau'n cynnwys digwyddiadau llwyddiannus, y diwydiant twristiaeth, entrepreneuriaid ifanc, a gwobr llwybr llwyddiant, sy'n dathlu unigolyn sy'n dilyn prentisiaeth neu raglen hyfforddi gyda busnes neu sefydliad lleol. Mae categori newydd sbon wedi'i gyflwyno eleni, sef gwobr arloesedd a thechnoleg, a fydd yn dathlu busnesau sydd wedi dangos rhagoriaeth mewn arloesegdd a'r defnydd creadigol o dechnoleg neu feddalwedd i ddatblygu eu busnes, eu cynnyrch, eu gwasanaethau neu eu prosesau gwaith.
Mae croeso i fentrau bach a mawr, sefydliadau dielw, elusennau a grwpiau cymunedol o bob cwr o'r sir gyflwyno cais a bod yn rhan o ddathliad o'r bobl a'r sefydliadau sy'n gwneud cyfraniad cadarnhaol at fywyd yng Ngheredigion ac yn helpu i wneud y sir yn lle gwell a mwy llewyrchus.
Trefnir y gwobrau gan Cynnal y Cardi o dan faner Caru Ceredigion. Mae Caru Ceredigion yn ymgyrch sy'n cael ei harwain gan y gymuned, gyda'r nod o feithrin ymdeimlad o falchder yn y sir, annog pobl i gymryd rhan mewn gweithgareddau sy'n gwella'r amgylchedd, cefnogi busnesau lleol a chryfhau cymunedau ledled Ceredigion.
Dywedodd y Cynghorydd Clive Davies, Aelod Cabinet Cyngor Sir Ceredigion dros yr Economi ac Adfywio:
“Bob dydd, mae unigolion a sefydliadau ledled Ceredigion yn dangos arloesedd, gwydnwch ac ymrwymiad i helpu eu cymunedau i ffynnu. Mae’r gwobrau hyn yn taflu goleuni ar y cyflawniadau hynny ac yn arddangos y dalent, yr uchelgais a’r ysbryd cymunedol sydd i’w gweld ledled y sir. Hoffwn annog busnesau, grwpiau cymunedol, elusennau ac unigolion i gyflwyno cais a’n helpu i ddathlu’r straeon llwyddiant sy’n gwneud Ceredigion yn lle mor arbennig i fyw, gweithio ac ymweld ag ef.”
Noddir Gwobrau Caru Ceredigion 2026 gan Lywodraeth Cymru, sy'n gweithio i gefnogi twf economaidd, mynd i'r afael â'r heriau sy'n wynebu pobl a mentrau, a datblygu cyfleoedd sy'n galluogi'r economi i dyfu a ffynnu.
Dywedodd Adam Price AS, Gweinidog Cabinet dros Fenter, Cysylltedd ac Ynni:
"Mae Gwobrau Caru Ceredigion yn gyfle pwysig i ddathlu'r busnesau, sefydliadau ac unigolion sy'n gwneud cyfraniad hollbwysig i economi a chymunedau Ceredigion.
"Wrth i ni ddatblygu cyfeiriad newydd ar gyfer economi Cymru, bydd arloesi yn rhan allweddol o'n dull gweithredu - rydym am gefnogi busnesau i ddatblygu cynhyrchion a gwasanaethau newydd, croesawu technolegau newydd, buddsoddi mewn ymchwil a datblygu, a gwella cynhyrchiant a chystadleudrwydd.
"Mae’n wych gweld bod gwobr newydd yn cael ei chyflwyno eleni, sef y Wobr Arloesedd a Thechnoleg, sy’n cydnabod busnesau ledled Ceredigion sy'n arloesi i ddatrys heriau, gwella profiadau cwsmeriaid, sbarduno twf cynaliadwy a chreu cyfleoedd newydd."
Er bod Ceredigion yn elwa ar rai o'r cyfraddau goroesi uchaf ar gyfer busnesau newydd yng Nghymru, gweithlu medrus â lefelau uchel o gymwysterau, a sector gwybodaeth sy'n ffynnu, mae heriau allweddol yn parhau. Ymhlith y rhain mae denu mwy o fusnesau i'r sir, creu swyddi o ansawdd uchel, darparu cyfleoedd i bobl ifanc adeiladu eu gyrfaoedd yn lleol, a
Mae'r rhestr lawn o gategorïau a meini prawf cymwys i'w gweld ar wefan Cyngor Sir Ceredigion: Caru Ceredigion Awards 2026 - Ceredigion County Council
Mae mynediad i'r gwobrau yn rhad ac am ddim. Y dyddiad cau ar gyfer ceisiadau yw dydd Gwener 16 Hydref 2026.
Bydd panel o feirniaid arbenigol yn asesu'r ceisiadau yn ystod mis Hydref, cyn cyhoeddi rhestr fer o'r rhai sydd wedi cyrraedd y rownd derfynol. Cyhoeddir enillwyr pob categori yn seremoni wobrwyo Gwobrau Caru Ceredigion 2026, a gynhelir ar 10 Rhagfyr 2026 yng Nghwesty'r Plu, Aberaeron.
Am fwy o wybodaeth am Wobrau Caru Ceredigion 2026 ac i gyflwyno eich enwebiadau, ewch i : Caru Ceredigion Awards 2026 - Ceredigion County Council
Os hoffech gysylltu ag aelod o'r tîm, anfonwch e-bost at: ce.cynnalycardi@ceredigion.gov.uk
13/08/2026