Ceredigion County Council website

Aeth Anna McMorrin AS ar daith dywys o amgylch ArloesiAber, cyfleuster datblygu integredig i gyflymu arloesedd ym meysydd bwyd a diod, yr economi gylchol a thechnoleg amaethyddol, ynghyd ag Athrofa y Gwyddorau Biolegol, Amgylcheddol a Gwledig (IBERS).

Mae’r Parc Arloesi Dyfodol Gwyrdd, menter sydd wedi ei chynnig ar gyfer campws Gogerddan y Brifysgol, yn un o sawl prosiect sy’n cael eu datblygu ar gyfer cefnogaeth bosibl gan Fargen Dwf y Canolbarth – rhaglen buddsoddi ranbarthol sy’n cael ei harwain gan Gynghorau Sir Powys a Cheredigion er mwyn hybu arloesedd, creu swyddi gwerth-uchel ac i dyfu’r economi ar draws y Canolbarth. Cefnogir Bargen Dwf Canolbarth Cymru gan Lywodraeth Cymru a Llywodraeth y Deyrnas Gyfunol.

Fel rhan o’r daith, clywodd y Gweinidog gan sawl busnes sydd eisoes yn elwa o gyfleusterau ArloesiAber a’r ymchwil sy’n cael ei wneud gan wyddonwyr IBERS, athrofa sy’n cael ei ariannu’n strategol gan Gyngor Ymchwil Biotechnoleg a Gwyddorau Biolegol UKRI.

Dywedodd Is-Ysgrifennydd Seneddol yn Swyddfa Cymru, Anna McMorrin AS: “Mae ArloesiAber yn llwyddiant ymchwil a datblygu yng Nghymru, gyda chefnogaeth Llywodraeth y Deyrnas Gyfunol drwy gyllid UKRI. Roedd yn wych clywed am eu gwaith gwych a’r cynlluniau uchelgeisiol ar gyfer Parc Arloesi newydd i adeiladu ar y llwyddiant hwnnw.

“Mae’r prosiectau hyn, ochr yn ochr ag ailddatblygu’r Hen Goleg a’r Promenâd, yn helpu i dyfu’r economi yn Aberystwyth ac yn cynnig swyddi da i bobl leol.”

Dywedodd Is-Ganghellor Prifysgol Aberystwyth, yr Athro Jon Timmis: “Pleser oedd croesawu’r Gweinidog yma i gwrdd â chydweithwyr, i weld y cyfleusterau ac i glywed am rai o’n cynlluniau cyffrous at y dyfodol.  Mae strategaeth ein Prifysgol yn ein hymrwymo i newid bywydau er gwell ac i ysbrydoli eraill i ddilyn yr un trywydd. Mae’r ymchwil ac addysgu a ddangoson ni yn ystod ymweliad y Gweinidog yn enghreifftiau gwych o hynny. Fel y Brifysgol gyntaf yng Nghymru, rydym yn gwthio ffiniau arloesi a gwybodaeth - gan feithrin a rhannu’r syniadau a’r arbenigedd sydd o fudd i bobl a’r blaned. Rwy wrth fy modd y gallai’r Gweinidog ddod i glywed am rhywfaint o’r gwaith hanfodol sy’n digwydd yma.”

Ychwanegodd Dr Rhian Hayward MBE, Prif Weithredwr ArloesiAber: “Mae buddsoddiad yn ArloesiAber eisoes yn talu ar ei ganfed o ran creu swyddi uchel eu gwerth a chlwstwr o egin fusnesau. Mae prosiectau sydd ar y gweill yn ehangu'n gyflym ac yn dangos addewid mawr o ran denu partneriaethau newydd rhwng y Brifysgol a diwydiant. Byddai Parc Arloesi Dyfodol Gwyrdd yn cynnig lle ychwanegol ar gyfer ehangu a hwyluso ymchwil ac arloesi cydweithredol pellach gyda diwydiant.”

Yn ogystal, cynigiodd yr ymweliad gyfle i dynnu sylw at effaith drawsnewidiol y Gronfa Adfywio Lleol (a elwid gynt yn Gronfa Ffyniant Bro) a sicrhawyd ar gyfer y dref gan Gyngor Sir Ceredigion.

Mae'r gronfa hon wedi galluogi ailddatblygiad uchelgeisiol Prifysgol Aberystwyth o'r Hen Goleg a gwelliannau mawr i fannau cyhoeddus ar hyd y Promenâd a welwyd gan y Gweinidog yn ystod ei hymweliad.

Pwysleisiodd y Cynghorydd Bryan Davies, Arweinydd Cyngor Sir Ceredigion, bwysigrwydd y buddsoddiadau hyn: "Mae hyn yn ymwneud â mwy na phrosiectau unigol — mae'n ymwneud â buddsoddiad cydlynol, hirdymor yn nyfodol Aberystwyth, Ceredigion a’r Canolbarth. Rydym ni’n adeiladu ar ein hasedau a'n potensial gwych yma yng Ngheredigion i dyfu ein heconomi ar draws gwahanol sectorau. Bydd hyn yn creu cyfleoedd ar gyfer twf cyflogaeth a busnes a gwneud ein hardal ragorol yn lle hyd yn oed yn fwy croesawgar, hygyrch a gwydn i drigolion ac ymwelwyr fel ei gilydd. Rydym ni’n falch o weithio gyda Llywodraethau Cymru a'r Deyrnas Gyfunol a'n partneriaid i wneud y gorau o’r cyfleoedd hyn."

I gael y wybodaeth ddiweddaraf am brosiect Adfywio’r Promenâd, ewch i:
www.ceredigion.gov.uk/PromAber 

I gael y wybodaeth ddiweddaraf am brosiect Hen Goleg, ewch i: https://www.aber.ac.uk/cy/oldcollege/ 

23/01/2026