Busnesau Canolbarth Cymru yn derbyn buddsoddiad drwy’r Gronfa Fuddsoddi Eiddo Masnachol
Mae nifer o fusnesau ledled Canolbarth Cymru wedi sicrhau buddsoddiad drwy Gronfa Fuddsoddi Eiddo Masnachol Canolbarth Cymru, gan gefnogi prosiectau a fydd yn helpu i gryfhau seilwaith masnachol y rhanbarth, datgloi twf a chreu cyfleoedd cyflogaeth newydd.
Mae’r gronfa, a lansiwyd ym mis Mai 2025 ac a ddarperir drwy Fargen Twf Canolbarth Cymru, wedi’i chynllunio i sbarduno buddsoddiad gan y sector preifat mewn eiddo masnachol. Mae’n defnyddio cymorth wedi’i dargedu i alluogi busnesau sefydledig ledled Powys a Cheredigion i ddatblygu, ehangu, adnewyddu neu ailddefnyddio safleoedd ac i ddatgloi cyfleoedd newydd ar gyfer buddsoddi a thwf busnes.
Dangoswyd diddordeb cryf yn y gronfa, gyda nifer o geisiadau hyfyw yn cael eu cyflwyno. Ar ôl proses asesu gychwynnol, cafodd nifer o brosiectau eu rhestru’n fyr a’u gwahodd i ddatblygu eu cynigion ymhellach ar gyfer ystyriaeth derfynol.
Mae’r prosiectau ar wahanol gamau, gan gwblhau eu hachosion busnes a datblygu eu cynlluniau buddsoddi – ond mae rhai eisoes yn symud ymlaen i’r cam cyflawni. Y prosiectau llwyddiannus sydd ar fin symud ymlaen yw:
-
Moduron Strata Motors, Ceredigion
-
MWP, Powys
-
Pent Haus Innova Mill, Powys
-
Williams Coaches, Powys
Gyda’i gilydd, mae’r prosiectau hyn yn cynrychioli buddsoddiad sylweddol yn nhirwedd eiddo masnachol Canolbarth Cymru, gan gefnogi sectorau gan gynnwys gweithgynhyrchu, adeiladu a’r fasnach fodurol.
Roedd y ceisiadau gwreiddiol yn cynrychioli gwerth prosiect cyfunol o tua £11.12 miliwn, gyda chyfraniad amcangyfrifedig o tua £3.96 miliwn gan y Gronfa. Ar draws y prosiectau, roedd y cynigion yn cynnwys creu mwy na 10,000 metr sgwâr o ofod masnachol, diogelu swyddi presennol a’r potensial i greu dros 100 o swyddi newydd.
Er bod cyllid wedi’i ddyfarnu i nifer dethol o brosiectau, nod ehangach y Gronfa yw cryfhau’r amgylchedd busnes ledled Canolbarth Cymru — gan helpu i gynyddu argaeledd ac ansawdd safleoedd masnachol, cefnogi cadwyni cyflenwi lleol, creu cyfleoedd cyflogaeth ac annog buddsoddiad pellach gan y sector preifat yn y rhanbarth.
Dywedodd y Cynghorydd Bryan Davies, Arweinydd Cyngor Sir Ceredigion, a’r Cynghorydd Jake Berriman, Arweinydd Cyngor Sir Powys ac yn Gyd-gadeiryddion Bwrdd Tyfu Canolbarth Cymru:
“Rydym yn falch iawn o weld y prosiectau cyntaf yn symud ymlaen drwy’r Gronfa Fuddsoddi Eiddo Masnachol Canolbarth Cymru ac yn camu i’r cyfnod cyflawni. Mae cryfder ac ansawdd y ceisiadau a gafwyd yn dangos yr uchelgais sydd gan fusnesau Canolbarth Cymru i fuddsoddi, tyfu a chreu cyfleoedd yn lleol.
Er bod cyllid yn cael ei dargedu at nifer o brosiectau unigol, bydd yr effaith ehangach yn cael ei theimlo ar draws economi’r rhanbarth — gan helpu i wella gofodau masnachol, cefnogi busnesau a chadwyni cyflenwi lleol, a chreu’r amgylchiadau ar gyfer twf a buddsoddiad yn y dyfodol ledled Canolbarth Cymru. Mae hefyd yn galonogol gweld prosiectau eisoes yn dechrau cael eu cyflawni, gan droi cynlluniau buddsoddi yn gynnydd gweledol ar lawr gwlad.”
Dywedodd Adam Price AS, y Gweinidog Cabinet dros Fenter, Cysylltedd ac Ynni: “Fel Llywodraeth newydd etholedig, rydym wedi ymrwymo i ddatgloi buddsoddiad mewn safleoedd eiddo masnachol fel bod gan fusnesau’r adeiladau sydd eu hangen arnynt i dyfu. Drwy’r gronfa hon, rydym nid yn unig yn helpu busnesau i ehangu a moderneiddio, ond hefyd yn cryfhau sylfeini economaidd Canolbarth Cymru. Mae’n arbennig o galonogol gweld nifer o brosiectau bellach yn symud ymlaen i ddarparu atebion eiddo o ansawdd uchel a fydd yn cefnogi cynhyrchiant, arloesi a ffyniant rhanbarthol hirdymor.”
Dywedodd Gweinidog Swyddfa Cymru, Anna McMorrin AS, Llywodraeth y DU: “Mae’r gronfa hon, a gefnogir gan fuddsoddiad Llywodraeth y DU ym Mhartneriaeth Twf Canolbarth Cymru, yn darparu grantiau i fusnesau ledled y rhanbarth, gan eu helpu i adeiladu safleoedd newydd a chymryd ymlaen fwy o weithwyr ac o brentisiaid. Twf economaidd a chreu swyddi a chyfleoedd i gymunedau lleol yw prif flaenoriaeth Llywodraeth y DU. Dyna pam rydym yn helpu i ariannu cynlluniau fel hwn yng Nghanolbarth Cymru, sy’n galluogi busnesau i ffynnu ac ehangu.”
Mae Cronfa Fuddsoddi Eiddo Masnachol Canolbarth Cymru yn ffurfio rhan o bortffolio ehangach Bargen Twf Canolbarth Cymru, a gefnogir gan £110 miliwn gan Lywodraethau’r DU a Chymru i gefnogi twf economaidd hirdymor ar draws y rhanbarth.
Bydd podlediad gan Business News Wales, sy’n cynnwys rhai o’r busnesau llwyddiannus a gefnogir drwy’r Gronfa, yn cael ei ddarlledu yr wythnos hon, gan arddangos rhai o’r busnesau, eu huchelgeisiau a’r effaith ehangach y disgwylir i’r buddsoddiad ei gael ledled Canolbarth Cymru.
Dilynwch Tyfu Canolbarth Cymru ar y cyfryngau cymdeithasol am ddiweddariadau pellach neu cofrestrwch i dderbyn y cylchlythyr misol: https://www.tyfucanolbarth.cymru/Cylchlythyron
17/06/2026