Yr awyr agored yn ysbrydoli pobl ifanc Ceredigion
Cynhaliwyd digwyddiad dathlu i bobl ifanc sy'n mynychu'r grwpiau Ysbrydoli drwy Wasanaeth Ieuenctid Ceredigion.
Roedd hwn yn gyfle i gydnabod eu cyflawniad o gwblhau cymhwyster cymorth cyntaf yn yr awyr agored a mynychu rhaglen sgiliau awyr agored 8 wythnos y gwanwyn hwn.
Llwyddodd y rhai a fu ynghlwm i gyflawni eu Cymhwyster Lefel 3 mewn Cymorth Cyntaf Awyr Agored yn llwyddiannus yn ogystal â dysgu sgiliau byw yn y gwyllt a phadlo ar y safle yn Padlwyr Llandysul.
Dywedodd Bethan Logan o'r bartneriaeth awyr agored a hwylusodd y prosiect: "Mae cwblhau'r rhaglen wedi cymryd ymrwymiad ac ymroddiad ac mae'r rhai sy'n ymgysylltu wedi dod â sgiliau i'w paratoi ar gyfer eu taith ymlaen, boed hynny'n cynnwys padlo caiacio, gofalu amdanynt eu hunain ac eraill mewn lleoliadau anghysbell neu weithio gyda'i gilydd a chyfathrebu'n dda fel tîm. Rydym yn dymuno'r gorau iddynt gyda'u hymdrechion yn y dyfodol ac yn gobeithio y bydd yr awyr agored yn parhau i fod yn lle iddyn nhw ragori a ffynnu".
Mae'r profiadau a gafwyd dros yr 8 wythnos wedi helpu 17 o bobl ifanc i fagu hyder mewn sgiliau cymorth cyntaf, rhoi cynnig ar brofiadau awyr agored newydd a chael profiadau addysgol cymdeithasol ac awyr agored.
Dywedodd James Barnes, un o'r cyfranogwyr, sydd â’I lun wedi atodi: "Mae wedi bod yn 6 wythnos bleserus iawn. Rwyf wedi mwynhau gyda phadlwyr Llandysul a mynd i lawr yr afon. Roeddwn i hefyd yn mwynhau diweddaru fy sgiliau cymorth cyntaf ac yn teimlo'n llawer mwy cyfforddus pe bawn i erioed yn gorfod defnyddio diffibriliwr ".
Ychwanegodd David Jones, rheolwr tîm yn y Gwasanaeth Ieuenctid: “Mae Ysbrydoli yn brosiect a ariennir drwy grant ac wedi’i ddarparu gan y gwasanaeth ieuenctid am fwy na 10 mlynedd. Elfen allweddol ohono yw gweithio mewn partneriaeth a chynnig cyfleoedd i bobl ifanc gymdeithasu, meithrin sgiliau a chefnogi eu nodau a’u dyheadau. Da iawn i’r holl bobl ifanc a gymerodd ran.”
Dywedodd y Cynghorydd Keith Evans, Cadeirydd Cyngor Sir Ceredigion ac Aelod Etholedig dros Dde Llandysul: "Mae'r sgiliau a'r gwytnwch y mae pobl ifanc yn eu datblygu wrth ddysgu yn yr awyr agored yn werthfawr tuag at symud ymlaen i'r byd gwaith ac mae cymorth cyntaf yn sgil a all fod o fudd i bawb yn ein cymuned, da iawn i bawb a gwblhaodd y cymhwyster".
Gwnaed y prosiect hwn yn bosibl trwy gyllid Sefydliad Moondance a dderbyniwyd gan y Bartneriaeth Awyr Agored a weithiodd gyda Gwasanaeth Ieuenctid Ceredigion a Padlwyr Llandysul i redeg prosiect llwyddiannus.
Os ydych rhwng 16 a 25 oed a bod gennych ddiddordeb mewn datblygu sgiliau bywyd, sgiliau sy'n barod i weithio, cwrdd â phobl newydd a rhoi cynnig ar bethau newydd, cysylltwch â porthcymorthcynnar@ceredigion.gov.uk; i gael rhagor o wybodaeth.
Gallwch hefyd ddilyn Gwasanaeth Ieuenctid Ceredigion ar y cyfryngau cymdeithasol i gael y wybodaeth ddiweddaraf:
- Facebook: @Gwasanaeth Ieuenctid Gwasanaeth Ieuenctid Ceredigion
- Instagram: @giceredigionys
- X: @GICeredigionYS