Ar eich beic – mis i fynd tan y Pencampwriaethau Seiclo
Dim ond mis sydd i fynd tan y bydd Pencampwriaethau Seiclo Cymru a Phrydain yn cael eu cynnal yng Ngheredigion.
I ddathlu hynny, mae’r Cynghorydd Shelley Childs wedi bod yn mwynhau rhai o lwybrau seiclo’r sir, ac yn eich annog chithau i roi cynnig arnynt hefyd.
Y Cynghorydd Shelley Childs yw Aelod Cabinet Ceredigion dros Briffyrdd a Gwasanaethau Amgylcheddol, ond mae hefyd yn gyn-feiciwr rasio amatur. Mae wedi cynrychioli Clwb Beicio Ystwyth mewn digwyddiadau ffordd yng Nghymru a'r DU dros y 30 mlynedd diwethaf. Ei uchafbwyntiau oedd dod y seiclwr lleol cyntaf i ennill trwydded rasio categori cyntaf ers tua 30 mlynedd trwy ennill a sgorio'n uchel mewn detholiad o rasys ffordd yng Nghymru, ac yn fwy diweddar, cynrychioli Prydain Fawr ym Mhencampwriaethau Duathlon y Byd ac Ewrop, gan ddod yn bumed yn ei gategori oedran.
Mae llawer o'i glod yn mynd i'r tir beicio gwych yng Ngheredigion i'w alluogi i hyfforddi. Dywedodd: "Mae gan Geredigion gymaint o gyfleoedd beicio gwych. Nid yw'n syndod iddo gael ei ddewis fel cartref Pencampwriaeth Seiclo Prydain ym mis Mehefin. Edrychwch ar y golygfeydd hyn. Maen nhw'n wych. Ac mae'r tir yn wych ond yn heriol hefyd. Mae Ceredigion wedi magu llawer o dalentau seiclo gwych, fel Josh Tarling, Stevie Williams, a Gruff Lewis. Gyda llefydd fel hyn i hyfforddi, does dim syndod."
Mae hefyd wedi cyd-drefnu AberCycleFest, gŵyl feicio flynyddol yn Aberystwyth ac mae'n aelod oes o Glwb Beicio Ystwyth. Felly, mae'n edrych ymlaen yn fawr at Bencampwriaethau Seiclo Cymru a Phrydain a gynhelir yng Ngheredigion o 26 tan 29 Mehefin.
Dewch draw i gefnogi'r digwyddiadau yn Aberaeron ac Aberystwyth. Bydd rhywbeth yno i bawb.
Gallwch ddod o hyd i'r holl wybodaeth am y llwybrau beicio a'r gweithgareddau sy'n ymwneud â'r digwyddiad cenedlaethol ar ein tudalen Pencampwriaethau Seiclo.
Gwyliwch y Cynghorydd yn mynd ar daith ar hyd un o'i hoff lwybrau yng Ngheredigion, o'r mynydd i'r môr, wrth iddo anelu o Gwmystwyth i Aberystwyth: