Ceredigion County Council website

Mae hunanasesiad Ceredigion yn gysylltiedig gyda gwelliant parhaus y Cyngor o trefniadau cynllunio corfforaethol a rheoli perfformiad, sy'n defnyddio asesiadau ar sail tystiolaeth, adolygiadau allanol a chynnwys rhanddeiliaid i lywio'r prosesau hyn.

Mae’r adroddiadu yn amlinellu’r canlyniadau ardderchog, a’r gwelliannau a wnaed flwyddyn ar ôl blwyddyn sy’n dangos bod y Cyngor wedi dysgu o brofiad ac yn gwrando ar mewnbwn gwerthfawr aelodau'r cyhoedd drwy ymgynghori ac ymgysylltu, gan dynnu sylw at yr hyn sy'n bwysig iddynt a sicrhau bod hyn yn cael ei adlewyrchu yn nodau'r Cyngor.

Cynhaliwyd arolwg rhanddeiliaid o drigolion a busnesau Ceredigion rhwng Mehefin ac Awst 2023. Dywedodd yr arolwg wrthym fod 90% yn cytuno neu'n cytuno'n gryf bod creu cyfleoedd gwaith a phrentisiaethau i bobl ifanc yn bwysig. Roedd 82% yn cytuno neu'n cytuno'n gryf ei bod yn bwysig blaenoriaethu cadwyni cyflenwi a chynnyrch o ffynonellau lleol ac roedd 86% yn cytuno neu'n cytuno'n gryf ei bod yn bwysig bod pobl leol yn gallu prynu cartrefi neu fyw'n lleol. 

Bu ffocws cryf ar fynd i'r afael â materion o'r fath gan Geredigion gyda chynnydd da ar y Fargen Twf Canolbarth sy’n prosiect gwerth £110; datblygu prentisiaethau ymhellach yn y Sir; blaenoriaethu cynnyrch o ffynonellau lleol; a chyflwyno'r Cynllun Tai Cymunedol ecwiti a rennir i enwi ond ychydig. Mae adroddiad manwl o'r canfyddiadau a'r camau a gymerwyd wedi'u cynnwys yn yr adolygiad blynyddol.

Mae'r adolygiad hefyd yn cynnwys manylion am sut mae'r cyngor wedi perfformio yn erbyn ei Amcanion Llesiant Corfforaethol, y cytunwyd arnynt yn 2022, sef:

• Hybu’r economi, cefnogi busnesau a galluogi cyflogaeth
• Creu cymunedau gofalgar ac iach
• Darparu'r dechrau gorau mewn bywyd a galluogi pobl o bob oed i ddysgu
• Creu cymunedau cynaliadwy a gwyrdd sydd wedi’u cysylltu’n dda â’i gilydd

Mae'r adroddiad hunanasesu yn tynnu sylw at ein cyflawniadau allweddol yn erbyn pob un o'r amcanion uchod. Dyma rai enghreifftiau:

•  Sicrhau cyllid o £10.9m drwy Gronfa Ffyniant Bro 2022-25
• Cymeradwyo £42.2m ar gyfer cais rhanbarth Canolbarth Cymru i Gronfa Ffyniant Cyffredin y DU
• Cefnogi 111 o fusnesau ar draws Ceredigion a 38 busnes newydd yn derbyn cefnogaeth
• 703 o ofalwyr cymwys yn derbyn £500 o daliadau cymorth i ofalwyr
• 13,188 o fynychwyr i raglenni ymyrraeth iechyd
• 510,711 o fynychwyr i raglenni gweithgarwch corfforol a gefnogir neu a ddarperir gan y Ganolfan Lles
• 1,722 o drigolion Ceredigion yn cymryd rhan yng Nghynllun Cenedlaethol i Atgyfeirio Cleifion i wneud Ymarfer Corff
• 380 o bobl ifanc yn cymryd rhan mewn gweithgareddau ar ôl ysgol a ddarperir gan y Gwasanaeth Ieuenctid
• 8,620 o sesiynau cyfrifiadurol cyhoeddus ar draws y llyfrgelloedd
• 93.2% o ddisgyblion Blwyddyn 13 mewn addysg, hyfforddiant neu gyflogaeth sy'n uwch na'r cyfartaledd cenedlaethol o 92.2%
• 72% o wastraff wedi’i ailgylchu wedi’i gompostio neu ei ailddefnyddio am y deuddeg mis hyd at fis Rhagfyr 2023 
• 3.8m o oriau cilowat o ynni adnewyddadwy a gynhyrchir gan asedau'r cyngor, yn uwch na’r 1.8m awr llynedd
• Gostyngiad o 41% mewn allyriadau carbon ers 2005
• Gwella 156 anheddau trwy Grantiau Cyfleusterau i'r Anabl ar gyfanswm gwerth o £960,600 

Dywedodd y Cynghorydd Bryan Davies, Arweinydd y Cyngor: “Rwy'n falch o adrodd ar y cynnydd rhagorol a wnaed o ran cyflawni ein hymrwymiadau a nodir yn y Strategaeth Gorfforaethol a'r Amcanion Llesiant. Mae hyn yn ganlyniad ardderchog arall nid yn unig i'n Swyddogion ymroddedig sydd wedi rhagori ar y targedau uchelgeisiol a osodwyd mewn amgylchedd ariannol mor anodd, ond hefyd i'n trigolion, sy'n elwa'n uniongyrchol o'r gwasanaethau a ddarparwyd.”