Cyngor yn cymeradwyo cynnal proses ymgynghori ar gyfer codi tâl am barcio ar bromenâd Aberystwyth
Mewn cyfarfod Cabinet Ceredigion a gynhaliwyd ar ddydd Mawrth 03 Medi 2024, cytunodd y Cabinet i gefnogi cynnal proses ymgynghori ar y cynigion a gyflwynwyd ynghylch codi tâl am barcio ar hyd rhannau o bromenâd Aberystwyth.
Amcan y cynllun yw rheoli'n well y galw am barcio yn Aberystwyth gan annog pobl i ddefnyddio meysydd parcio oddi ar y stryd y Cyngor a fyddai'n fwy priodol ar gyfer diwallu'r galw hwn am barcio. Caiff hyn ei gyflawni drwy sicrhau cydbwysedd rhwng gwahanol elfennau gan addasu’r polisi parcio presennol ac ystyried y lleoliadau, yr hyn sydd ar gael a chost gymharol parcio o ran y ddarpariaeth ar y stryd a’r ddarpariaeth oddi ar y stryd drwy opsiynau costau is tymhorol oddi ar y stryd.
Byddai cyflwyno trefn o godi tâl am barcio ar y stryd yn ariannu costau gweithredol y cynllun arfaethedig. Os byddai unrhyw incwm dros ben yn cael ei sicrhau, byddai’n cael ei ddefnyddio i gefnogi ariannu gwasanaethau cyhoeddus hanfodol eraill a ddarperir gan Gyngor Sir Ceredigion sy’n dod o fewn cwmpas yr hyn a ganiateir o dan Adran 55, Deddf Rheoleiddio Traffig Ffyrdd 1984.
Ystyrir bod digon o lefydd parcio sbâr ar gael ym meysydd parcio Cyngor Sir Ceredigion, y meysydd parcio preifat oddi ar y stryd (gan gynnwys y rheiny sydd i’w datblygu) a’r llefydd eraill sy’n cael eu rheoleiddio ar y stryd ac felly rhagwelir na fydd parcio mewn mannau eraill neu strydoedd eraill (yr hyn sy’n cael ei alw’n Saesneg yn ‘displacement parking’) yn un o ganlyniadau negyddol posibl y cynllun hwn.
Rhai o’r manteision o’r cynllun yw:
• Mwy o fynd a dod o ran cerbydau sy’n parcio ar y stryd
• Y cynnydd a ragwelir mewn busnes
• Defnyddio mwy ar drafnidiaeth gyhoeddus a defnyddio mwy nag un dull o deithio
• Lleihau tagfeydd traffig a gwella llif y traffig mewn mannau lle ceir llawer o draffig yng nghanol y dref
• Hybu mwy o deithio llesol
O dan y cynllun arfaethedig, byddai deiliaid y Bathodyn Glas yn cael eu heithrio o dalu am barcio a byddent hefyd yn cael eu heithrio o unrhyw gyfyngiadau amser pan fyddent yn parcio mewn man y codir tâl amdano ar yr amod eu bod yn arddangos eu Bathodyn Glas yn y modd a ragnodir. Mae’r eithriad hwn eisoes yn berthnasol o ran cilfachau aros cyfyngedig ac felly ni fyddai’r cynllun yn arwain at newid nac unrhyw effeithiau andwyol o ran parcio ar y stryd ar gyfer deiliaid bathodynnau glas.
Dywedodd y Cynghorydd Keith Henson, Aelod Cabinet Ceredigion sy’n gyfrifol am Briffyrdd: “Mae promenâd Aberystwyth yn lleoliad gwerthfawr yng nghanol y dref. Pwrpas y cynllun yw creu trosiant o draffig i alluogi fwy o geir i fynd a dod heb effeithio’n negyddol ar economi’r sir. Cyn bo hir, bydd y broses ymgynghori ar y cynigion a gyflwynwyd yn dechrau felly gwnewch yn siŵr eich bod yn ymateb i'r ymgynghoriad.”
Bydd proses ymgynghori ar y cynigion a gyflwynwyd yn cychwyn yn fuan ac fel rhan o hyn bydd cyfle i randdeiliaid, gan gynnwys preswylwyr, busnesau/staff, ac ymwelwyr rannu eu barn. Bydd manylion pellach yn cael eu darparu maes o law.
Bydd canlyniadau’r ymgynghoriad yn cael eu hadrodd i'r Cabinet cyn y gwneir penderfyniad ynghylch gweithredu'r cynnig.