Cyngor Sir Ceredigion yn ceisio mewnbwn y cyhoedd ar y polisi trwyddedu tacsis a cherbydau hurio preifat diwygiedig
Mae Cyngor Sir Ceredigion yn gwahodd trigolion i roi eu barn ar y Polisi a’r Amodau ar gyfer Cerbydau Tacsi a Cherbydau Hurio Preifat sydd wedi’i ddiwygio. Nod yr ymgynghoriad hwn yw sicrhau bod tacsis a cherbydau hurio preifat yn parhau i ddarparu gwasanaeth hanfodol i gymunedau gwledig, yr economi gyda'r nos, a theithwyr anabl, tra hefyd yn hyrwyddo cynhwysiant cymdeithasol.
Mae tacsis a cherbydau hurio preifat yn hanfodol i lawer o breswylwyr, yn enwedig mewn ardaloedd gwledig lle gall mathau eraill o drafnidiaeth gyhoeddus fod yn brin. Maent yn chwarae rhan hanfodol wrth sicrhau teithio diogel ac addas, gan gyfrannu'n sylweddol at yr economi leol a llesiant cymunedol.
Fel yr Awdurdod Trwyddedu o dan Ddeddf Llywodraeth Leol (Darpariaethau Amrywiol) 1976 a Deddf Town and Police Clauses Act 1847, mae Cyngor Sir Ceredigion wedi ymrwymo i gynnal safonau rheoleiddio uchel. Datblygwyd y polisi diwygiedig yn unol â chanllawiau statudol Llywodraeth y Deyrnas Unedig a chanllawiau a argymhellir gan Lywodraeth Cymru ar gysoni trwyddedu tacsis a cherbydau hurio preifat yng Nghymru (2021).
Rydym yn annog preswylwyr i ddarllen y ddogfen ddrafft a chwblhau'r arolwg ar-lein i rannu eich barn. Os hoffech dderbyn y wybodaeth mewn fformat gwahanol, cysylltwch â'r Cyngor ar 01545 570881 neu e-bostiwch clic@ceredigion.gov.uk. Mae copïau papur o'r arolwg hefyd i’w cael mewn llyfrgelloedd a chanolfannau hamdden lleol. Gellir dychwelyd yr arolwg wedi'i gwblhau i lyfrgelloedd lleol neu eu hanfon i’r Tîm Trwyddedu yng Nghyngor Sir Ceredigion, Canolfan Rheidol, Llanbadarn Fawr, Aberystwyth, SY23 3UE.
Dywedodd y Cynghorydd Matthew Vaux, Aelod Cabinet Ceredigion dros Bartneriaethau, Tai, Y Gyfraith a Llywodraethiant a Diogelu’r Cyhoedd: "Rydym wedi ymrwymo i sicrhau bod ein gwasanaethau tacsi a cherbydau hurio preifat yn cyrraedd y safonau uchaf o ran diogelwch a’u bod yn addas i bob teithiwr. Mae'r polisi diwygiedig hwn yn adlewyrchu ein hymroddiad i gefnogi cymunedau gwledig, gwella'r economi gyda'r nos, a hyrwyddo cynhwysiant cymdeithasol. Rydym yn gwerthfawrogi mewnbwn ein trigolion ac yn annog pawb i gymryd rhan yn yr ymgynghoriad hwn i'n helpu i lunio polisi sy'n diwallu anghenion ein cymuned."
Am fwy o wybodaeth a diweddariad ar yr argymhelliad hwn, gall preswylwyr gysylltu â ni drwy ffonio 01545 570881 neu anfon neges e-bost at clic@ceredigion.gov.uk.