Mae ein Swyddog Rhianta a’n Gweithwyr Teuluoedd hyfedr yn gweithio ochr yn ochr â rhieni a gofalwyr i greu teuluoedd mwy cydnerth. Rydym yn gwneud hyn drwy gynorthwyo rhieni i wella eu lles eu hunain ac i ddysgu sgiliau newydd.
Rydym yn mynd ati gyda theuluoedd i baratoi ac i strwythuro cynlluniau gweithredu drwy ddefnyddio’r dull Arwyddion Diogelwch. Mae hyn yn ein helpu i nodi atebion posibl yn hytrach na chanolbwyntio ar broblemau. Mae hyn yn cynorthwyo aelodau’r teulu i nodi’r camau a fydd yn eu galluogi i gyflawni eu nodau nhw, ac i gymryd y camau hynny.
Gall y gwasanaethau a ddarperir gennym ni helpu oedolion â threfn y dydd, darparu hyfforddiant iddyn nhw o ran technegau rhianta cadarnhaol, a’u helpu i gymryd rhan mewn gweithgareddau cymdeithasol a chymunedol.
Mae ein Swyddog Rhianta a’n Gweithwyr Teuluoedd yn cydweithio’n agos â’r Tîm o Amgylch y Teulu. Yn ogystal â’n grwpiau a’n cyrsiau, mae cymorth un i un ar gael i deuluoedd yr ardal hefyd.
- Paratoi i fod yn rhieni
- Croeso i’r byd
Rhaglen wyth wythnos i rieni sy’n disgwyl babi yw’r rhaglen hon. Bydd rhieni’n mynd i sesiynau’r grŵp o oddeutu wythnos 26 o’u beichiogrwydd. Ymhlith y testunau a drafodir mae empathi a sylw cariadus, datblygiad ymennydd babanod, dewisiadau bwyta iach, bwydo ar y fron, gofalu am fabanod, rheoli straen a theimladau anodd, hybu hunan-barch a hunanhyder, a pherthynas y pâr. - Tylino Babanod
Mae tylino babanod yn cynorthwyo rhieni i greu cwlwm agosrwydd â’u babi, yn cysuro’r babi, ac yn helpu’r babi i gysgu’n well, ymhlith llawer o fuddion eraill. Cwrs i rieni babanod rhwng wyth wythnos a saith mis oed yw hwn. - Y Blynyddoedd Rhyfeddol – Babanod a Phlant Bach
Rhaglen wyth wythnos yw hon. Mae’n gyfle i rieni rannu eu profiadau a’u syniadau ag eraill, gan ddysgu mwy ar yr un pryd, a’r cyfan mewn amgylchedd cefnogol. - GroBrain – Babanod a Phlant Bach
Mae cyrsiau GroBrain yn para pedair wythnos. Yn ystod y cyrsiau hyn, rydym yn trin a thrafod pwysigrwydd creu cwlwm agosrwydd, datblygiad yr ymennydd, ymlyniad, a chyfathrebu. - Family Links – Rhaglen Meithrin Rhieni
Rhaglen sy’n para deg wythnos yw hon. Ei nod yw gwella iechyd emosiynol rhieni a phlant. Mae’n cynorthwyo oedolion i ddeall ac i reoli eu teimladau a’u hymddygiad, ac i fod yn fwy cadarnhaol ac anogol yn eu perthynas â’u plant a’i gilydd. - Family Links – Rhaglen Meithrin Rhieni i rieni plant ag anabledd neu anghenion arbennig
Rhaglen wedi’i theilwra i rieni plant tair i dair ar ddeg oed ag anabledd neu anghenion arbennig yw’r rhaglen hon. Mae’r rhaglen sy’n para deg wythnos yn rhannu syniadau a strategaethau i helpu i gynorthwyo plant pan fydd eu hemosiynau yn eu llethu, yn egluro pam fod plant yn ymddwyn fel y maen nhw, ac yn darparu cymorth gan rieni sydd mewn sefyllfaoedd tebyg ac sydd wedi cael profiadau tebyg. - Rhaglen Awtistiaeth
Mae’r Rhaglen Awtistiaeth yn para deg wythnos ac yn cael ei darparu’n rhithiol drwy sesiynau dwy awr. Cafodd y rhaglen hon ei llunio i gynorthwyo rhieni plant sydd ar restrau aros y Tîm Asesu Cyfathrebu Cymdeithasol neu’r Tîm Niwroddatblygiadol i gael asesiad awtistiaeth, neu rieni plant sydd wedi cael diagnosis awtistiaeth yn ddiweddar. I fodloni meini prawf y grŵp, rhaid bod gan y rhai sy’n dilyn y rhaglen hon blentyn sydd wedi cael diagnosis cyflwr ar y sbectrwm awtistig yn ddiweddar neu blentyn sy’n aros i gael asesiad - Rhaglen ADHD
Gweithdy i rieni sy’n canolbwyntio ar yr unigolyn ac yn cael ei gynnal ochr yn ochr â Judith Thomas, Nyrs Arbenigol ADHD Pediatrig, a’r Tîm Rhianta a Chefnogaeth i Deuluoedd, yw hwn. Mae’n datblygu dealltwriaeth o’r Anhwylder Diffyg Canolbwyntio a Gorfywiogrwydd (ADHD), yr hyn y bydd diagnosis ADHD yn ei olygu i rieni a phlant, a strategaethau i fynd i’r afael â rhai o’r ymddygiadau cyffredin. I fodloni meini prawf y grŵp, rhaid bod gan rai sy’n dilyn y rhaglen hon blentyn sydd wedi cael diagnosis ADHD yn ddiweddar neu blentyn sy’n aros i gael diagnosis ADHD - Rhaglen SPACE
Bwriedir i’r Rhaglen Cynorthwyo Rheini a Phlant yn Emosiynol (SPACE) ddarparu gwybodaeth, gan ddefnyddio ymwybyddiaeth o drawma, am ymddygiad emosiynol plant ac oedolion. - Rhoi’r Bai ar yr Ymennydd
Gweithdy diwrnod a ddatblygwyd gennym ni fel tîm yw hwn. Yn ystod y gweithdy, rydym yn trin a thrafod testunau fel datblygiad ymennydd pobl ifanc yn y glasoed, cyfathrebu, datganiadau ‘fi’, pennu rheolau a ffiniau, a llawer mwy. Mae’r gweithdai hyn yn cael eu cynnal ledled y sir ac maen nhw ar gael i rieni pobl ifanc rhwng wyth ac un ar bymtheg oed. - Grwpiau Talking Teens
Yn seiliedig ar yr ymchwil ddiweddaraf i’r glasoed, ac yn gydnaws ag egwyddorion y Rhaglen Meithrin Rhieni, mae’r grwpiau’n rhoi darlun cadarnhaol o ddatblygiad pobl ifanc yn eu harddegau, ac yn canolbwyntio ar y berthynas rhwng aelodau’r teulu, cyfathrebu, negodi, penderfynu, a strategaethau i leihau gwrthdaro. - Diogelwch ar-lein a chwarae gêmau ar-lein
Sesiwn ar-lein sy’n codi ymwybyddiaeth ac yn meithrin dealltwriaeth o’r risgiau sydd ynghlwm wrth chwarae gêmau ar-lein a defnyddio’r rhyngrwyd yw’r weminar hon. Rydym yn tynnu sylw at gyfyngiadau oedran a dulliau cyfathrebu. Mae hwn yn weithdy i rieni/gofalwyr plant a phobl ifanc, yn ogystal â gweithwyr proffesiynol. - Rhaglen Triple P Teen
Rhaglen magu plant i rieni pobl ifanc yn y glasoed yw hon. Mae’n darparu trysorfa o syniadau, a gall rhieni ddewis pa strategaethau i’w defnyddio a sut i’w defnyddio. Yn y bôn, y nod yw sicrhau bod y rhaglen yn gweithio i chi. Mae’n para wyth wythnos, gyda phum sesiwn mewn grŵp a thair sesiwn ymarfer yn y cartref.
Rydym yn sicrhau bod yr wybodaeth gywir ddiweddaraf ar gael bob amser i sicrhau bod modd i deuluoedd wneud dewisiadau gwybodus a’u bod yn gwybod am yr holl wasanaethau sydd ar gael iddyn nhw.
www.facebook.com/TeuluoeddCeredigionFamilies
